ಆರೋಗ್ಯವಿರುವಾಗ ದೇಹವನು ಕಾಪಾಡು,
ಇಚ್ಛೆ ಕ್ರಿಯೆಗಳ ಬಲದಿಂದ ಸಾಧನೆಯ ಮಾಡು;
ಅಶಕ್ತತೆ ಬಂದಾಗ ಪ್ರಕೃತಿಯ ಧರ್ಮವ ತಿಳಿ,
ವಿವೇಕ ವೈರಾಗ್ಯದ ಬೆಳಕಲಿ ಬದುಕನು ಕಲಿ;
ದೇಹವನು ಕಡೆಗಣಿಸಿದರೆ ಸಾಧನೆಯೆಲ್ಲಿ?
ದೇಹವೇ ನಾನೆಂದು ಹಿಡಿದರೆ ಮುಕ್ತಿಯೆಲ್ಲಿ?

~ಮಾಹೆ

ಕಾಮ ಕ್ರೋಧಗಳ ಗೆಲ್ಲುವ ಸಂಕಲ್ಪ,
ಆಲಸ್ಯ ಬಂದರೆ ನಾಳೆಗೆ ಮುಂದೂಡುವ ಜಪ;
ಬೇರುಹುಳುವಂತೆ ಒಳಗೇ ಕೊರೆಯುವುದು,
ಮಾಡದ ಕೆಲಸಕೆ ನೂರು ನೆಪ ಹುಡುಕುವುದು;
ಕಾಮ ಕ್ರೋಧಗಳ ಗೆಲ್ಲುವೆನೆಂಬ ಧೀರ,
ಆಲಸ್ಯಕೆ ಸೋತರೆ ಎಂತಹ ಶೂರ!

~ಮಾಹೆ