@kannada

ಬೆಳಕಿನ ಹುಡುಕಾಟ, ನಾದದ ಬೆನ್ನಾಟ,
ಮನದ ಕಲ್ಪನೆಗಳಲಿ ಎಂತಹ ಅಲೆದಾಟ!
ಕಾಣುವ ದೃಶ್ಯಗಳೆಲ್ಲ ಬಂದು ಹೋಗುವವು,
ಕಾಣುವವನ ಸತ್ಯವ ಮರೆಮಾಚುವವು;
ಅಲೆದಾಡುವ ಮನವು ಅವನಲಿ ನೆಲೆಸಿದಾಗ,
ಹುಡುಕುವವ ಕರಗಿ, ಸತ್ಯವೇ ಉಳಿವುದಂತೆ.

~ಮಾಹೆ

ಅವನ ಪ್ರೀತಿಸುವುದೇ ಭಕ್ತಿ,
ಅವನ ಪ್ರೀತಿಗೆ ಪಾತ್ರವಾಗುವುದೇ ಮುಕ್ತಿ;
ತಾಯಿಯ ಮಡಿಲಲಿ ಮಗುವಿಗೆ ಮುಚ್ಚುಮರೆಯೇಕೆ?
ಅವನ ಸನ್ನಿಧಿಯಲಿ ಅಹಂಕಾರದ ಹೊದಿಕೆಯೇಕೆ?
ಕೆರೆಯ ನೀರನು ಕೆರೆಗೆ ಅರ್ಪಿಸಿದಂತೆ,
ನನ್ನನು ಅವನಿಗೆ ಅರ್ಪಿಸುವುದೇ ಶರಣಾಗತಿಯಲ್ಲವೇ?

~ಮಾಹೆ