ಹಣ್ಣಿನ ಬಣ್ಣವ ತಿಳಿದರೆ ಹಸಿವು ತಣಿಯುವುದೇ? ಮನದ ಗುಣವ ಓದಿದರೆ ಚಂಚಲತೆ ಅಳಿಯುವುದೇ? ಕಂಡ ಹಣ್ಣಿನ ರುಚಿಗೆ ಸವಿಯುವ ಅಭ್ಯಾಸ, ಕೇಳಿದ ಜ್ಞಾನದ ಅರಿವಿಗೆ ನಿತ್ಯದ ಪ್ರಯಾಸ; ಮನದ ಆಟವ ಅರಿಯದೆ ಆತ್ಮವ ಅರಿಯುವುದೆಲ್ಲಿ? ತನ್ನ ಮನವ ತಾನರಿಯದಿರೆ ಸಾಧನೆಯ ಫಲವೆಲ್ಲಿ?
ನನ್ನಿಷ್ಟವೇ ನಡೆಯಲೆಂಬ ಅಹಂಕಾರದ ಬೀಜ, ಎಲ್ಲರೂ ನನ್ನಂತೆ ನಡೆಯಲೆಂಬ ಅದರ ವೃಕ್ಷ; ನನ್ನ ಮಾತು ಕೇಳಿರೆಂಬ ಆಗ್ರಹವೇಕೆ? ಪರರ ಮಾತು ಕೇಳಲಾರದ ಹಟವೇಕೆ? ಸ್ವೇಚ್ಛೆಗೆ ನೀರೆರೆದರೆ ಅಹಂಕಾರದ ಮರ, ತಾಳ್ಮೆಗೆ ನೀರೆರೆದರೆ ನಿರಹಂಕಾರದ ಚಿಗುರು!