poetry

Jataka Bandi

ಬೇಲಿ

ಹೊಲದ ಸುತ್ತ ಬೇಲಿ ಬೆಳೆದದ್ದು
ಹೂವ ಕಾಯಲೆಂದು, ಹಣ್ಣ ಕಾಯಲೆಂದು;
ಹೊಲವ ಆಳಲೆಂದಲ್ಲ.

ನಿಯಮಗಳೂ ಹಾಗೆಯೇ
ಪ್ರೀತಿಯ ಕಾಯಲಿ, ಕರುಣೆಯ ಕಾಯಲಿ,
ವಿನಯದ ಬೆಳೆಗೆ ನೆರಳಾಗಲಿ.

ಬೇಲಿಯೇ ಎತ್ತರವೆಂದು ಬೀಗಿದ ದಿನ,
ಹೂವು ಕಣ್ಣಿಗೆ ಕಾಣದಾಯಿತು.

ಸಾಧನೆ ಎಂದರೆ ಬೇಲಿ ಕಟ್ಟುವುದಲ್ಲ
ಬೇಲಿಯಾಚೆಯೂ ಹೂವ ಕಾಣುವ
ಮನವ ಬೆಳೆಸಿಕೊಳ್ಳುವುದು.

~ ಮಾಹೆ

ಕನ್ನಡಿ

ಕನ್ನಡಿಯ ಎದೆಯಲಿ
ಯಾವ ರೂಪ ಮಲಗಿತೋ
ನೋಡುವ ಕಣ್ಣಿನಲಿ
ಯಾವ ನೆರಳು ನಿಂತಿತೋ

ಧೂಳೊಂದು ಕವಿದಾಗ
ಮುಖವೇ ಮರೆಯಾಯಿತು
ಒರೆಸಿದ ಕ್ಷಣದಲಿ
ಬೆಳಕೇ ಎದುರಾಯಿತು

ಕನ್ನಡಿ ಹೊಸದಾಗಿ
ಏನನ್ನೂ ಪಡೆಯಲಿಲ್ಲ
ಇದ್ದ ಪ್ರತಿಬಿಂಬವ
ಮತ್ತೆ ತೋರಿಸಿತಲ್ಲ

ಕೇಳಿದೆ ಕನ್ನಡಿಯನು
ನಾನಾರು ಹೇಳೆಂದು
ಮೌನದಿ ನಗುತ್ತದು
ನನ್ನನ್ನೇ ತೋರಿಸಿತು

ಒರೆಸಿದ್ದು ಕನ್ನಡಿಯ
ಧೂಳೆಂದು ತಿಳಿದಿದ್ದೆ
ಕರಗಿದ್ದು ಎಲ್ಲಿಯೋ
ನನ್ನದೇ ಮಬ್ಬಾಗಿತ್ತು

~ ಮಾಹೆ

ಧೈರ್ಯ

ಬಳ್ಳಿಯ ಸುತ್ತ
ಮರಗಳೆಷ್ಟಿದ್ದರೇನು?

ಬೇರದು
ನೆಲವ ಹಿಡಿಯದಿರೆ?

ದೋಣಿಯ ಸುತ್ತ
ಅಲೆಗಳೆಷ್ಟಿದ್ದರೇನು?

ಹುಟ್ಟದು
ಕೈಯ ಹಿಡಿಯದಿರೆ?

ಮನವಾತಕೆ
ಪರರ ಬಲವ ಎಣಿಸುತ
ತನ್ನೊಳಗಿನ ಧೈರ್ಯವ
ಹುಡುಕಲು ಮರೆತಿದೆ?

~ ಮಾಹೆ