poetry

Jataka Bandi

ಕೊಳಲು

ಬಿದಿರಿನ ಮೈಯಲಿ
ಯಾವ ರಾಗ ಮಲಗಿತೋ
ಖಾಲಿಯ ಎದೆಯಲಿ
ಯಾವ ಗಾನ ಕಾದಿತೋ

ಗಾಳಿಯು ಬಂದಾಗ
ಉಸಿರಾಗಿ ಬೆರೆತಿತು
ಬೆರಳಿನ ಸ್ಪರ್ಶದಲಿ
ಸ್ವರವಾಗಿ ಹರಿಯಿತು

ತನ್ನದೇ ಹಾಡೆಂದು
ಕೊಳಲು ಹೇಳಲಿಲ್ಲ
ತನ್ನೊಳ ಹರಿದುದನು
ತಡೆದು ನಿಲ್ಲಿಸಲಿಲ್ಲ

ಕೇಳಿದೆ ಕೊಳಲನು
ಸಂಗೀತವೆಲ್ಲಿಂದೆಂದು
ಮೌನದಿ ನಗುತ್ತಿತ್ತು
ಖಾಲಿಯನ್ನೇ ತೋರಿತು

ಆ ಕ್ಷಣ ನನ್ನೊಳ
ಏನೋ ಕರಗಿಹೋಯಿತು
ಉಳಿದ ಮೌನದಲಿ
ಯಾರೋ ಹಾಡುತ್ತಿದ್ದರು

~ ಮಾಹೆ

ನೆರಳು

ಬೀಜವೊಂದು
ಕಾಡ ನೋಡುತ್ತ
ಮರವಾಗಲು
ಕಲಿಯುವುದೆ?

ನಕ್ಷತ್ರವೊಂದು
ಚಂದ್ರನ ನೋಡಿ
ಬೆಳಗಲು
ಕಾಯುವುದೆ?

ಮನವೊಂದು ಮಾತ್ರ
ತನ್ನೊಳಗಿನ ವನವನು
ಮರೆಯುತ್ತ
ಪರರ ನೆರಳನು
ಹಿಂಬಾಲಿಸುವುದೇಕೆ?

~ ಮಾಹೆ

    ಅಭ್ಯಾಸ

    ಹನಿಹನಿಯ ಅಭ್ಯಾಸ, ಮನದಲಿ ಸಂಸ್ಕಾರ,
    ಬಿಡಬಿಡುತ ಬಂಧನವ, ಮೂಡುವ ವೈರಾಗ್ಯ;
    ಕ್ಷಣದ ಮೌನವೇ ಮಾತಿಗೆ ಕಾವಲು,
    ಕ್ಷಣದ ಅರಿವೇ ಹೆಜ್ಜೆಗೆ ದೀವಿಗೆ;
    ಆದರ್ಶ ತೋರಿದರೆ ಗುರಿಯಷ್ಟೇ ಕಾಣುವುದು,
    ಅಭ್ಯಾಸ ಹಿಡಿದರೆ ದಾರಿಯೇ ತೆರೆಯುವುದು.

    ~ಮಾಹೆ