lifepath

ಹುಟ್ಟಿದ್ದೆಲ್ಲವೂ ಸಾಯುವುದಂತೆ ಜಗದಲಿ,
ನೀರು, ಗಾಳಿ, ಬೆಳಕು ಹುಟ್ಟಿದ್ದ ಕಂಡವರಾರು?

ಅದು ಸತ್ಯವಾದರೆ,
ಪ್ರೀತಿ ಹುಟ್ಟಿತೆನ್ನುವವರಾರು?
ಹುಟ್ಟೇ ಇಲ್ಲದ ಪ್ರೀತಿಗೆ
ಕೊನೆಯಾದರೂ ಎಲ್ಲಿಹುದು ಜಗದಲಿ?

~ ಮಾಹೆ

ಗ್ರಂಥಗಳು ತೋರಬಹುದು ಬೆಳಕಿನ ದಾರಿ,
ನಡೆದ ಹೆಜ್ಜೆಯೇ ನಮ್ಮ ಸ್ವಂತ ಸವಾರಿ;
ಪ್ರತಿದಿನದ ಬದುಕೇ ಒಂದೊಂದು ಪುಟ,
ತಪ್ಪು ಒಪ್ಪುಗಳೇ ಮೌನದ ಪಾಠ;
ತನ್ನನ್ನೇ ಓದಲು ಕಲಿತ ದಿನದಿಂದ,
ಬದುಕೇ ಗ್ರಂಥ, ಅನುಭವವೇ ಗುರು.

~ಮಾಹೆ

ಏಕಾಂತದ ಮೌನದಲಿ ಶಾಂತವೆನಿಸಿದ ಮನ,
ಲೋಕದ ಗದ್ದಲದಲಿ ಉಳಿದರೆ ಅಪ್ಪಟ ಚಿನ್ನ;
ನಿಂದೆ ಬಂದರೂ, ನಷ್ಟ ಕಾಡಿದರೂ,
ನಮ್ಮವರೇ ಮನದಂತೆ ನಡೆಯದಿದ್ದರೂ;
ಅಲುಗದ ಅರಿವೇ ಸಾಧನೆಯ ನಿಜ ಫಲ,
ಪ್ರಪಂಚವೇ ಪರೀಕ್ಷೆ, ಪ್ರತಿಕ್ರಿಯೆಯೇ ಸ್ವಾನುಭವ.

~ಮಾಹೆ