poetry

ಪುಟ್ಟ ಹಕ್ಕಿಗದೆಂತು ಗೊತ್ತು
ಟೊಂಗೆಯದು ಮರದ ಕಿವಿಗಳೆಂದು
ಅವಳ ಕಂಠಸಿರಿಗೆ ಸೋತ ಮಾತೆಯವಳು
ಎಲೆಗಳಾಡಿಸಿಹಳು ಮೆಚ್ಚುಗೆ ಸೂಸುತ ನಿಂದು

ಪುಟ್ಟ ಹಕ್ಕಿಗದೆಂತು ಗೊತ್ತು
ಅಲ್ಲೆ ಕುಳಿತಿಹ ಗಿಡುಗನ ಗೂಡದೆಂದು
ಅವಳ ಕಂಠಸಿರಿಗೆ ಕಾದು ಕುಳಿತ ಮಾತೆಯವಳು
ಹಾಡದು ಅವಳ ಕಂದಮ್ಮಗಳ ಲಾಲಿಯದೆಂದು

ಪುಟ್ಟ ಹಕ್ಕಿಗದೆಂತು ಗೊತ್ತು
ತುಂಟ ಬೆಕ್ಕಿನ ಮನೆಯ ಹಿತ್ತಲದೆಂದು
ಅವಳ ಕಂಠಸಿರಿಗೆ ಹೊಂಚುಹಾಕಿಹ ಮಾತೆಯವಳು
ಆಟಕೊ ಊಟಕೋ ಹಿಡಿಯ ಹಂಬಲಿಸಿಹಳೆಂದು

ಪುಟ್ಟ ಹಕ್ಕಿಗದೆಂತು ಗೊತ್ತು
ಮನೆಯೊಡತಿಯ ಕೋಣೆಯ ಕಿಟಕಿಯದೆಂದು
ಕಂಠಸಿರಿಗೆ ಸ್ವರವ ಸೇರಿಸಿ ನಲಿಯ ಬಯಸಿಹಳೆಂದು
ನಿನದಷ್ಟೆ ಅಲ್ಲವೋ ನೀನಿರುವ ಜಗವಿದೆಂದೂ