ಸೇವೆಯ ಕೈಯಲಿ ‘ನಾನು’ ಉಳಿದರೆ ಬಂಧನ,
ತಪದ ಮೌನದಲಿ ‘ನಾನು’ ಬೆಳೆದರೂ ಬಂಧನ;
ಖ್ಯಾತಿಯ ಸೇವೆಯೂ ಬೇಡ, ಸಿದ್ಧಿಯ ತಪವೂ ಬೇಡ,
‘ನಾನು’ ಕರಗಿ ‘ನಾವು’ ಅರಳುವುದೇ ಸಾಧನೆ;
ನಿಸ್ವಾರ್ಥ ಸೇವೆಯೇ ಮೌನದ ತಪವಾಗಲಿ,
ಲೋಕಹಿತದ ತಪವೇ ಪ್ರೀತಿಯ ಸೇವೆಯಾಗಲಿ.

~ಮಾಹೆ

ಲೋಕವ ನನ್ನಂತೆ ತಿರುಗಿಸಲೆಂದರೆ ಅಶಾಂತಿ,
ಲೋಕವಿದ್ದಂತೆ ಒಪ್ಪಿದರೆ ಅದೇ ಶಾಂತಿ;
ಹೊರಗೆ ಹಿಡಿತವ ಹುಡುಕಿದರೆ ಅಹಂಕಾರದ ಸೆಳೆತ,
ಒಳಗೆ ನೆಲೆಯ ಕಂಡರೆ ಕರಗುವುದು ಅವಲಂಬನೆಯ ತುಡಿತ;
ಹೊರಗಿನ ಅಲೆಗಳು ಏಳಲಿ, ಇಳಿಯಲಿ,
ಒಳಗಿನ ಸಾಗರ ಮಾತ್ರ ಮೌನವಾಗಿರಲಿ.

~ಮಾಹೆ

ಗ್ರಂಥದ ಪುಟಗಳು ದಾರಿಯ ತೋರಬಹುದು,
ನಡೆದ ಹೆಜ್ಜೆಗಳೇ ಸತ್ಯವ ಕಲಿಸಬಹುದು;
ಪ್ರತಿದಿನದ ಬದುಕೇ ತೆರೆದಿರುವ ಗ್ರಂಥ,
ತಪ್ಪು ಒಪ್ಪುಗಳೇ ಅದರ ಮೌನದ ಮಂತ್ರ;
ತನ್ನನ್ನೇ ಓದುತ್ತ, ತನ್ನನ್ನೇ ಮೀರುವ ಪಯಣ,
ಕೊನೆಗೆ ಬದುಕೇ ಚರಿತ್ರೆ, ಅನುಭವವೇ ದರ್ಶನ.

~ಮಾಹೆ