ಮುರಿದ ಹಲ್ಲಿನ ಬುಡದಲಿ ಉಳಿದ
ಹಾಲ್ಗಲ್ಲ ನವಿರನು ಸವೆಸಿದ
ಬಾಲ್ಯದ ತುಂಟತನ ಮರೆಯಾದುದೆಲ್ಲಿ?

ಅಂಧಶ್ರದ್ಧೆಯ ಬಲೆಯಲಿ ಸಿಲುಕಿದ
ಮಧುರ ಕಂಠದ ಹನಿಗವನವೆಲ್ಲಿ?
ನಾ ಕಂಡ ಹರುಷದ ಅಲೆಗಳ ನಡುವೆ
ಕಾಣದ ಪ್ರೀತಿಯ ಹುಡುಕಿಹೆಯೆಲ್ಲಿ?

ಕಳೆದರೂ ವರುಷ, ಮರೆತರೂ ಹರುಷ,
ಬಾಲ್ಯದ ಹುರುಪದು ತೊರೆಯುವುದೆಲ್ಲಿ?

ಕಾಯದೆ ಮುಂದಿನ ಜನ್ಮದ ಬದುಕನು,
ಇಂದೇ ಈ ಕ್ಷಣವ ಬದುಕಿಬಿಡು ಇಲ್ಲಿ;
ಮುರಿದ ಹಲ್ಲಿನ ಸಂದಿಯಲಿ ನಗುವ
ಆ ಮಗುವನು ಮತ್ತೆ ಕಂಡುಕೋ ಇಲ್ಲಿ.

~ ಮಾಹೆ

ನದಿ ನೀರ ಹರಿವಿನಲಿ
ಉದುರಿದ ಎಲೆಯ ನೆಲೆ;
ಗಾಳಿಯ ಕೈವಾಡವೋ,
ಅದನೇರಿ ದಡ ಸೇರುವ ಹಂಬಲದ
ಕೀಟದ ಪ್ರಾರ್ಥನೆಯ ಫಲವೋ?

ಋಣ ಯಾರದು? ಅದೃಷ್ಟ ಯಾವುದದು?
ಎಲೆಗೋ, ಗಾಳಿಗೋ, ಹರಿವಿಗೋ ತಿಳಿಯದು…
ಎಲ್ಲವ ದಡ ಸೇರಿಸುವ ಅವಳ
ಕೃಪೆಯ ನೆರಳಷ್ಟೇ ದಿಟವು.

~ ಮಾಹೆ